Гляджу на народ, слухаю, што ён кажа. Акрамя дыялогаў тыпу «пачом ты курэй брала — па 30 ці па 32», я не чую нічога — ніякіх абурэнняў. У тралейбусах і маршрутках грае «цудоўны» расійскі шансон, і ўсім добра так .Беларусаў жа цікавіць, як там Алачка з Галкiным. Іх хвалюе, ударыў Філечка журналістку ці не ўдарыў. Нават мая мама — інтэлігент і адукаваны чалавек — і тая казала мне: «Ён жа не мог гэтага зрабіць, ён жа такі добры!»...
Нашыя людзі больш любяць рускі рок, чым беларускі. Ну што тут зробіш? Яны не ведаюць мовы, яны элементарна не разумеюць, пра што спяваецца ў песнях. А навошта ламаць галаву і перакладаць? Тым больш што многія мову на дух не пераносяць.
Памятаю, як мы выступалі ў канцэртнай зале «Мінск» з групай «Чайф». Мы былі першымі, а яны — другімі. Дык з залы чуліся выкрыкі, каб мы звальвалі. Вы лічыце, гэта нармальна? Гэта як калі б у Германіі выйшла на сцэну свая каманда, і немцы крычалі: «Пайшлі на хер адсюль!» Гэта звычайнае хамства, бескультур’е беларускае.
У Беларусі з 1994 года будавалася крамлёўская мадэль. Цяпер усё гэта адбываецца ў Расіі. Толькі апалітычны чалавек можа гэтага не ведаць. Тым не менш, там ёсць альтэрнатыўныя каналы, музыкам даюць эфір, людзі выйшлі на Балотную. Яны не могуць гэтага замаўчаць. А тут разагналі «купку хуліганаў», якія пабілі дзверы. Пасля вядоўца БТ мітусіўся ў жывым эфіры па студыі, а нейкая цётка ў парыку з шалёнымі вачыма сказала, што ўсіх чвартаваць трэба. Я глядзеў на гэта і разумеў, што адбываецца правакацыя, і ўсё гэта зацерлі, як за Сталіным. Нічога не было...
Я хаджу ў крамы, езджу на маршрутках… І вось што я думаю. Беларусы падобныя да пацукоў і прусакоў. Што з імі ні рабі, яны выжываюць, але ў адрозненне ад насякомых і грызуноў, з кожным годам беларусаў робіцца ўсё менш.
У мяне такое адчуванне, што перастань ім плаціць зарплату, а яны ўсё роўна будуць хадзіць на працу. «А як жа ж не хадзіць, сыночак, я ж усю жызнь — ад ранку і да вечара!» Гэта менталітэт такі.
Беларусь — гэта такі сацзвярынец атрымаўся. Краіна, у якой культуры няма, але ўдзяўблі ў галовы «за Беларусь», «мы беларусы», а хто гэта такія — народ не задумваецца. Тут выгадаваны савецкі народ, які любіць хадзіць на працу і рабіць нешта. Трэба тое, што ён робіць, ці не трэба — іншае пытанне.
«Ой, сыночак, ты ж толькі ў палітыку не лезь!» А я не лезу. Я проста цікаўлюся, хто мной кіруе, хто вырашае маё жыццё. У гэтым жа і ёсць заслуга дэмакратыі. Ім немагчыма патлумачыць, што не павінен сядзець наверсе галоўны павук, які тузае за вяроўкі.
За гэты год без усялякіх намаганняў апазіцыі адбылося шмат падзей, якія павінныя былі ўключыць мазгі. Але калі яны ўключаюцца толькі калі бензін даражэе, то прабачце… Значыць, людзям патрэбны толькі танны бензін і ежа. Пра свабоду і сэнсу няма казаць...
Усё гэта было прадумана, што вырасце пакаленне людзей, якія ведаюць толькі Лукашэнку. І яны выраслі. Гледзячы ў вочы гэтым людзям, якія ідуць біць сваіх землякоў, нічога добрага не адчуваеш. Амапаўцы, cуддзі… Пра што яны думаюць? А дактары, якія маўчалі, калі Някляева вывалаклі з бальніцы людзі ў чорным? Каму яны клятву давалі?
На Вадохрышча іду на працу, праходжу міма царквы. Бачу, з аўтобуса вылазіць амапавец з трохлітровай бутляй і ідзе ваду наліваць. Я падумаў: цікава, ён спачатку адмяцеліць каго-небудзь, а потым будзе вадзіцу святую піць і свечку ў царкве паставіць?
Часам я падазраю, што над Беларуссю нешта распыляюць. У нас і без марыхуаны ўсе ўкураныя. У паветры разліты пафігізм.
Увы, рынки производства г.вна уже заняты, потому что много его не нужно
